سوسن بدر تجيب على هذا السؤال؟!
توب سينما : القاهرة
في إحدى المقابلات التلفزيونية تم سؤال النجمة المصرية الكبيرة سوسن بدر عن السعادة .
سوسن قالت “زمان كان دايمًا فيه خلاف بيني وبين أبويا وأمي، الله يرحمهم كانوا دايمًا يقولوا: “اقعدي معانا شوية، إحنا ما بقيناش نشوفك..وكنت بعمل كده عشان ما أزعلهمش، بس كنت بعمله وأنا ببص في الساعة، وبفكر إمتى هخلص عشان أقوم أشوف اللي ورايا في الدنيا، عايزة أجري، أروح شغلي، أخلص الحديث الصحفي الفلاني، أعمل البرنامج العلاني، أحضر الميتينج، أجري وأجري… طول الوقت بجري!
النهارده، بقول هما كان عندهم حق.. السعادة إنك تقعد فعلًا مع الناس اللي بتحبهم. الطلب ده – “اقعد معانا” – يمكن يكون أهم من أي شغل هتعمله، وأهم من أي نجاح هتحققه، وأهم من أي فلوس هتكسبها”.
والحقيقة المؤكدة؛ إنك مهما كنت ناجح، مُثقف، مُجتهد وشاطر في شغلك إلا إن فيه حاجات تانية ممكن تنساها وسط انشغالك لكنها مهمة اكتر من اي حاجه في الدنيا.. وهي (القعدة مع الناس اللي بيحبوك) بتنسى تستمتع بوجودهم في حياتك وبكل دقيقة معاهم..
السعادة الحقيقية هي انت مُهم عند مين؟ بتحكي لمين عن نجاحك وشغلك؟ بتفكر في مين يشاركك حياتك، تأثر فيه ويأثر فيك، وتفضلوا في ضهر بعض طول العمر؟
دي حاجات غالية جدًا مهما وصلت لنجاحات لا تُعد ولا تُحصى مفيش حاجه هتعوّضك عنها.
